२ भदौ,

सूचना तथा सञ्चार मन्त्री डा मीनेन्द्र रिजालले आगामी माघ ७ गते नेपाली जनताले सङ्घीय लोकतान्त्रिक नयाँ संविधान पाउने दाबी गर्नु भएको छ ।   विराटनगर विमानस्थलमा आज बिहान सञ्चारकर्मीहरूसँग कुरा गर्दै मन्त्री रिजालले संविधान लेखन कार्य तालिका अन्तिम चरणमा पुगेकाले समयमै संविधान जारी हुने बताउनुभयो ।

    नेपाल सरकारका प्रवक्तासमेत रहनुभएका मन्त्री रिजालले प्रधानमन्त्रीले भदौ महिनाभित्र शासकीय स्वरुप र सङ्घीयतालगायतका विवादित विषयमा टुङ्गो लगाउन दलहरूबीच वार्ता एवम् छलफल सुरु गरिसक्नु भएको जानकारी दिनुभयो ।  प्रधानमन्त्रीले समयमै संविधान जारी गर्न विवादित विषयमा सहमति कायम नभएमा हस्तक्षेपकारी भूमिका समेत निर्वाह गर्न सक्नु हुनेछ मन्त्री डा रिजालले भन्नुभयो ।

    संविधानको मस्यौदा अन्तिम चरणमा पुगेकाले नयाँ बन्ने संविधानमा सबैको स्वामित्व कसरी कायम गर्न सकिन्छ भनेर आजदेखि प्रधानमन्त्रीले संविधानसभाभित्र र बाहिर रहेका दलहरूसँग छलफल सुरु गर्न लाग्नुभएको जानकारीसमेत उहाँले दिनुभयो ।  मन्त्री डा रिजालले नेपाली काँग्रेस तथा एमालेबीच भएको सातबुँदे सहमति कार्यान्वयन गर्न काँग्रेस प्रतिबद्ध रहेको उल्लेख गर्दै सम्झौतामा केही त्रुटि भएमा त्यसलाई सच्चाएर अगाडि बढ्न सकिने धारणासमेत व्यक्त गर्नुभयो ।

    मन्त्री रिजाल विराटनगरबाट प्रकाशित हुने उद्घोष दैनिकको १०आँै वार्षिकोत्सव समारोहमा सहभागी हुन आज विराटनगर आउनुभएको हो ।