२८ जेठ ,

 महानगरीय प्रहरी परिसर भक्तपुरले हतियारसहित दुईजनालाई पक्राउ गरेको छ ।  महानगरीय प्रहरी परिसर भक्तपुरले आज यहाँ आयोजना गरेको पत्रकार सम्मेलनमा प्रहरी उपरीक्षक जगतमान श्रेष्ठले हतियारधारी टोलीबाट जर्मनीमा बनेको दुई थान पेस्तोल, सोही पेस्तोलमा प्रयोग हुने तीन थान म्याग्जिन र १८ राउन्ड गोली बरामद गरेको बताउनुभयो ।

पक्राउ पर्नेमा सुनसरी बकलौरी–९ घर भई हाल काठमाडौँ बाँसबारी बस्ने २१ वर्षीय सविनराज धामी र बारा रतनपुर घर भई हाल काठमाडौँ चक्रपथ बस्ने २६ वर्षीय गोपाल घलानलाई पेस्तोल, म्याग्जिन र गोलीसहित सिपाडोल–१ जगातेबाट पक्राउ गरिएको हो ।

    त्यसैगरी, प्रहरीले अमेरिकी डलर देखाई ठगी गर्ने एक जनालाई पक्राउ गरेको छ ।

महानगरीय प्रहरी वृत्त थिमिको टोलीले विशेष सूचनाका आधारमा मध्यपुरथिमि नगरपालिका–१६ लोकन्थलीबाट अमेरिकी डलर ५० को एकथान कागजको बन्डलमाथि र एक थान तल राखेर बिटो बनाई अमेरिकी डलर सस्तोमा सटही गर्ने भन्दै ठगी गर्न हिँडेको एकजनालाई पक्राउ गरेको हो ।

पक्राउ परेका दोलखा सिगटी–३ का २२ वर्षीय विनोद तामाङबाट तीन थान एक दरको अमेरिकी डलर, डलर साइजको एक मुठा कागजको बण्डल र सिमकार्ड तीन थान र मोबाइल एक थान बरामद गरी प्रहरीले आजै ठगी मुद्दा चलाएको छ ।