२७ जेठ,

 सिरहा–चोहर्वा सहायक सडकखण्डअन्तर्गत सिरहाको चन्द्रअयोध्यापुर गाविस–८ मा आज अपराह्न भएको सवारी दुर्घटनामा सवारी चालकको मृत्यु भएको छ भने अन्य चारजना घाइते भएका छन् ।  इलाका प्रहरी कार्यालय मिर्चैयाका अनुसार सिरहा सदरमुकामबाट चोहर्वातर्फ आइरहेको बा. ११ च १८७५ नम्बरको मारुती भ्यानले अगाडि रहेको ज. १ ज ३९० नम्बरको भ्यानलाई ठक्कर दिँदा अनियन्त्रित भई मारुती भ्यान पल्टिएको थियो ।

 सडकबाट तल खसेर पल्टिएको मारुती भ्यानका चालक काठमाडौँ स्वयम्भूका २८ वर्षीय राजेश मल्ल गम्भीर घाइते भएको र उनलाई उपचारका लागि लहान ल्याउने क्रममा बाटोमै मृत्यु भएको इप्रका मिर्चैयाका प्रहरी निरीक्षक वेदप्रसाद गौतमले बताउनुभयो । घाइते हुनेहरूमा मारुती भ्यानमा रहेका स्वयम्भू, काठमाडौँंकै दीपिका शर्मा, विमल शर्मा र सिरहाको मिर्चैया–४ की रामप्यारी महरा र गीता महरा  छन् ।

महराद्वयको मिर्चैयास्थित फूलकुमारी महतो मेमोरियल अस्पताल र शर्माद्वयको लहानमा उपचार भइरहेको छ । प्रहरीले म्याजिक भ्यानलाई नियन्त्रणमा लिई फरार चालकको खोजी गरिरहेको छ ।