१० जेठ ,

दाङमा महिलाको नाममा घर जग्गा पास  गराउनेको संख्यामा बृद्धि  भएको छ । सरकारले पुरुषलाई भन्दा महिलालाई घरजग्गा  पासमा सहरी क्षेत्रमा २५ र ग्रामिण क्षेत्रमा ३० प्रतिशत कर छुट दिने नियम बनाए पछि घर जग्गा रजिष्ट्रेसनका माध्यमबाट स्वामीत्व प्राप्त गर्ने महिलाहरुको संख्या बढ्दै गएको मालपोत कार्यालय दाङका प्रमुख टिकाराम घिमिरेले बताउनु भयो ।

चालु आर्थिक वर्षको बैशाख मसान्तसम्म ७ हजार ९ सय १३ जना महिलाको नाममा घर जग्गा पास  भएको छ । चालु आर्थिक बर्षको बैशाखसम्म एक करोड ८८ लाख ७० हजार २७ रुपैंया राजस्व छुट पाएका थिए ।

जसमध्य ग्रामीण क्षेत्रबाट ५७ लाख ९३ हजार ७ सय २२ रुपैंया महिलाहरुले घरजग्गा पास  गरेबापत छुट पाएका थिए । यस्तै सहरी क्षेत्रबाट एक करोड ३० लाख ७६ हजार तिन सय ५ रुपैंया छुट पाएका थिए । गत आर्थिक बर्ष ९ हजार ३९ जना महिलाको नाममा घरजग्गा पास बाट  एक करोड ७८ लाख ५० हजार ५५ रुपैंया राजस्व छुट पाएका थिए ।

यस आर्थिक वर्षको बैशाख मसान्त सम्ममा ग्रामिण क्षेत्रका ४ हजार ४ सय ४२ र सहरी क्षेत्रका ३ हजार ४ सय ७१ जना महिलाको नाममा घरजग्गा पास भएको कार्यालयका मालपोत अधीकृत भरतचन्द्र अधीकारीले बताउनुभयो ।