२८ जेठ,

निमु संगम घर्ती ,
दाङमा ९ किलो लागूऔषध चरेससहित दुई जनालाई प्रहरीले पक्राउ गरेको छ । घोराही नगरपालिका-९ का २६ बर्षीय दुर्गाबहादुर केसीलाई र ललित वलीलाई बुधवार ९ किलो चरेससहित पक्राउ गरिएको जिल्ला प्रहरी कार्यालय दाङले जनाएको छ ।

केसी र वलीलाई घोराही नगरपालिका-११ भरतपुरमा रहेको झुपाल केसीको घरमा खानतलासी गर्दा ९ किलो चरेससहित पक्राउ गरिएको दाङका प्रहरी प्रमुख एसपी शरदकुमार खत्रिले जानकारी दिए ।  उनीहरुसहित पाँच जना युवाहरुले घोराही-१० की देबसरा रोका र ऋतु केसी वाठाको गहना चोरी भागेको अभियोगमा केसीलाई पक्राउ गर्दा सो परिमाणको चरेस बरामद भएको प्रहरीले जनाएको छ ।

तीन दिन पहिले देवसरा र ऋतुलाई विजौरीमा रहेको सन्ध्या कटेजमा बोलाएर दुई तोला बढी सुनका गहना लुटेर लगेको भन्ने पीडितहरुले प्रहरीमा उजुरी दिएपछि प्रहरीले केसी र वलीलाई पक्राउ गरेको हो । उनीहरुबिरुद्ध डाँका चोरी तथा लागू औषध मुद्दामा कारवाही प्रकृया सुरु भएको प्रहरीले जनाएको छ ।

यसैवीच तुलसीपुर नगरपालिका-६ स्थित सपना होटलमा कृष्ण सागर वली र सुरज वलीलाई खुकुरी र तरवार प्रहार गरी फरार रहेका मानपुर-४ का प्रकाश बस्नेतलाई पक्राउ गरिएको प्रहरीले जनाएको छ ।