बलिउड अभिनेता शाहरुख खान विश्वकै धनी अभिनेताहरुको सूचीमा दोस्रो नम्बरमा परेका छन् । एक चर्चित अन्तर्राष्ट्रिय वेबसाइट 'वेल्थ एक्स' द्वारा  हालै जारी गरिएको हलिउड–बलिउड कलाकारहरुको सूचीमा शाहरुख दोस्रो स्थानमा परेका हुन् ।

इन्डियन प्रिमियर लिग (आइपीएल)को एक टिमका मालिक रहेका शाहरुखले कमाइका मामिलामा हलिउडका चर्चित कलाकारहरुलाई पनि पछाडि पारेका छन् । शाहरुखले कमाइमा चर्चित अमेरिकी अभिनेताद्धय टम क्रूज र जोनी डेप समेतलाई उछिनेका हुन् ।

उक्त वेबसाइटका अनुसार ४८ वर्षीय शाहरुखको कुल सम्पत्ति करिब ६० करोड डलर रहेको छ । यस सूचीको शीर्ष स्थानमा भने चर्चित अमेरिकी हाँस्य अभिनेता जेरी साइनफेल्ड रहेका छन् । उनको कुल सम्पत्ति ८२ करोड डलर रहेको छ ।

यस सूचीको तेस्रो स्थानमा टम क्रूज रहेका छन् । उनको सम्पत्ति ४८ करोड डलर रहेको जनाइएको छ भने सूचीमा चौंथो स्थान बनाएका जोनी डेपको कुल सम्पत्ति ४५ करोड डलर रहेको उल्लेख छ ।

विश्वकै धनी कलाकारको शीर्ष १० को सूचीमा भारतका शाहरुख मात्रै परेका भारतीय सञ्चारमाध्यमहरुले जनाएका छन् । - एजेन्सी